Bakıda Həvari Bartalmayın anma günü qeyd edilib

Bakı şəhərinin səmavi hamisi həvari Bartalmayın anım günü Qız Qalasının ətəyində müqəddəsə akafist ilahilərin ifası ilə ibadət keçirilib. Ənənəyə görə, həmin gün Azərbaycanın xristianları 1892-ci ildə tikilmiş və 1936-cı ildə dağıdılmış həvari Bartalmay ibadətgahının bünövrəsi üstündə dua etmək üçün toplaşırlar. Səhər tezdən olmasına baxmayaraq, hər il bu ibadət müqəddəsin köməyini və şəfaətini diləyən və dua etmək istəyən bir çox imanlıları toplayır. Həvari Bartalmayın şəhid olduğu yerdə keçirilən ibadətə Bakı və Azərbaycan yepiskopu Aleksiy başçılıq edib. İbadətdə Azərbaycanda Rusiya Federasiyanın Səfiri M. Evdokimov və Azərbaycanda Katolik Kilsəsinin apostol prefekti yepiskop Vladimir Fekete iştirak edib. Bayram ibadəti müq. Mürr-Daşıyan Zənənlər kafedral kilsəsində İlahi Liturgiya ilə davam edib.