Yeparxiya şöbəsinin rəhbəri “Böyük şücaətin tarixi” adlı sərginin açılışında iştirak edib

Bakı Rus Evində Böyük Vətən Müharibəsi illərində Krımın azad edilməsinin 80 illiyinə həsr olunmuş “Böyük şücaətin tarixi” adlı sərginin açılışı olub. Sərginin əsas mövzusu Azərbaycanın sakinləri - Suvorov ordenli S. Orconikidze adına 77-ci Qırmızı Bayraqlı Simferopol atıcı diviziyasının döyüşçülərinin ölməz şücaətidir. Sərgiyə toplaşanları Rusiya Federasiyasının Azərbaycan Respublikasındakı fövqəladə və səlahiyyətli səfiri Mixail Yevdokimov salamlayıb. Rusiya Federasiyası Dövlət Dumasının 7-ci çağırışının deputatı Pavel Şperov çıxışında Azərbaycan xalqının ümummilli lideri Heydər Əliyevin Azərbaycan əsgərlərinin xatirəsinin yaşadılmasında və onların şücaətinin əbədiləşdirilməsində əvəzsiz xidmətlərini qeyd edib. Sonra P.Şperov qonaqlara 77-ci Simferopol piyada diviziyasının keçdiyi şərəfli döyüş yolundan danışıb.

Tədbirdə Milli Məclisin deputatları, Rusiya Federasiyasının Azərbaycandakı səfirliyinin əməkdaşları, soydaş təşkilatlarının və gənclər birliklərinin nümayəndələri, mədəniyyət xadimləri, azadlıq uğrunda döyüşçülərin övladları və digərləri iştirak ediblər. Bakı Yeparxiyasını tədbirdə yeparxiya idarəsinin ictimai təşkilatlarla qarşılıqlı əlaqələr şöbəsinin rəhbəri, protoiyerey Mefodiy Əfəndiyev təmsil edib.