Bakı yeparxiya idarəsinin katibi Azərbaycan müsəlmanlarını Ramazan bayramı münasibətilə təbrik edib

Qafqaz Müsəlmanları İdarəsinin sədri, Şeyxülislam Allahşükür Paşazadə həzrətlərinə.

Möhtərəm Şeyx Həzrətləri!

Sizi və Sizin simanızda Azərbaycanın bütün çoxsaylı müsəlman ümmətini Ramazan bayramı münasibətilə ürəkdən təbrik edirik!

Bu gündə bütün dünya müsəlmanları müqəddəs Ramazan ayının başa çatmasını qeyd edir. Bu ay ərzində möminlər dua və səbr etməyə, mərhəmət və şəfqət əməllərini etməyə, ehtiyacı olanlara yardım etməyə çağırılır. Ramazan bayramı sülh, qardaşlıq sevgisi və mərhəmət bayramıdır. Bu dəyərlər qədim Azərbaycan torpağında tarixən məskunlaşan bütün millətlərə və dinlərə mənsub insanlar üçün eyni dərəcədə yaxın və başa düşüləndir, ölkəmizdə hökm sürən sülhün, harmoniyanın və qarşılıqlı hörmətin əsasını təşkil edir. Bütün Azərbaycan xalqının rifahı naminə dinlərarası dialoqun və konstruktiv əməkdaşlığın möhkəmləndirilməsi və inkişaf etdirilməsi istiqamətində birgə səylərimizə Allah xeyir-dua versin deyə dua edirik.

Rəhman və Rəhmli olan Yaradan müsəlman bacı-qardaşlarımızın oruc və namazlarını, xeyirxah əməllərini və xoş niyyətlərini qəbul etsin, hər birimizə sülh və bərəkət bəxş etsin!

Azərbaycanın pravoslav icması adından Bakı Yeparxiya İdarəsinin katibi, protoiyerey Dionisiy Sveçnikov.