Stavropoldan olan zəvvarlar Bakı kilsələrini ziyarət ediblər

Ölkənin xristian ziyarətgahları ilə tanış olmaq üçün Azərbaycana gələn stavropollu zəvvarlar Bakı şəhərinin kilsələrində olublar.  Stavropollular Azərbaycan paytaxtının pravoslav kilsələri ilə tanışlığa Müqəddəs Mürr-Daşıyan Zənənlər kafedral kilsəsindən başlayıblar. Onlar həmçinin kafedral kilsəsində İlahi Liturgiyada iştirak etdilər.  Kafedral kilsəsində keçirilən ibadətə Bakı və Azərbaycan yepiskopu Aleksiy başçılıq edib. Arxiyereyi kafedral kilsəsinin ruhaniləri və səfərdə zəvvarları müşayiət edən Stavropol yeparxiya dəftərxanasının rəhbəri, iyerey Aleksiy Podkolzin müşayiət ediblər.  Liturgiyanın sonunda yepiskop Aleksiy zəvvarlara salamlama nitqi ilə müraciət edib, onlara Azərbaycanın xristian ziyarətgahları haqqında məlumat verib və ölkə üzrə maraqlı səyahət arzulayıb. 

Qonaqlar Bakı şəhərinin səmavi himayədarı Müqəddəs Həvari Bartalmayın mübarək qalıqları və kafedral kilsəsinin digər qüdsiyyətləri qarşısında dua etmək imkanı əldə ediblər. Stavropollular yeparxiya muzeyinin və arxiyepiskop Aleksandr İşein adına yeparxiya kitabxanasının sərgisi ilə də tanış olublar. 

Sonra zəvvarlar Bakı şəhəri Allahın Əqdəs Validəsinin Mövludu və Ali-Mələk Mikayıl  kilsələrini ziyarət ediblər. Həmin gün qonaqlar Qız Qalasının yaxınlığında kilsə ənənəsinin müqəddəs həvari Bartalmayın  şəhidliyi  ilə əlaqələndirdiyi məkanın yerləşdiyi İçərişəhər (Köhnə Şəhər) tarix-memarlıq qoruğunda olublar. 1936-cı ilə qədər həmin yerdə müqəddəs həvarinin şərəfinə tikilmiş pravoslav ibadətgah var idi. 

Ziyarət səfəri Bakı Yeparxiyasının Zəvvarlıq şöbəsi və Stavropol Yeparxiyasının “Xaç şəhəri” zəvvarlıq xidməti tərəfindən təşkil olunub.