Azərbaycanın dini liderlərinin Vatikana səfəri başlayır

Moskva və bütün Rusiyanın Patriarxı Kirilin xeyir-duası ilə, Bakı yeparxiyasının katibi, arximandrit Aleksiy (Nikonorov) Qafqaz Müsəlmanları İdarəsinin (QMİ) sədri Şeyxülislam Allahşükür Paşazadənin rəhbərlik etdiyi nümayəndə heyətinin tərkibində Vatikana səfərə yola düşüb.

QMİ-nin Mətbuat Xidmətinin məlumatına görə, yanvarın 17-dək davam edəcək səfər Müqəddəs Taxt-Tacla Azərbaycan Respublikası arasında mövcud yüksək səviyyəli münasibətlərin dini-mənəvi müstəvidə, dinlərarası dialoq və əməkdaşlıq platformasında daha da möhkəmlənməsinə xidmət edəcəkdir.

Səfər Roma Katolik Kilsəsinin başçısı Zati-müqəddəsləri Papa Fransiskin rəsmi dəvəti ilə həyata keçirilir. Səfər çərçivəsində Papa Fransisklə görüş planlaşdırılıb.