Bazar məktəbinin şagirdləri İçərişəhərə ekskursiya ediblər

Müqəddəs Mürr-Daşıyan Zənənlər kafedral kilsəsinin bazar məktəbinin şagirdləri İçərişəhərə ekskursiya ediblər. 
İçərişəhər – Bakının mərkəzində yerləşən tarixi-memarlıq qoruğu və UNESCO-nun Ümumdünya İrs Siyahısına daxil edilmiş abidədir. XII əsrə aid möhkəm qala divarları ilə əhatə olunmuş İçərişəhər təkcə paytaxtın ən qədim hissəsi deyil, həm də Bakının ən qədim yaşayış məhəlləsidir. Qədim şəhərin dar küçələrində yerləşən tarixi evlərdə bu gün də bir neçə min bakılı yaşayır. Çoxsaylı memarlıq abidələri, Şirvanşahlar Sarayı, Bakı xanlarının evi, qədim məscidlər və karvansaralar, muzeylər, incəsənət qalereyaları, rəssam və xalq sənətkarların emalatxanaları İçərişəhəri Azərbaycanın paytaxtına gələn turistlərin ən çox ziyarət etdiyi məkanlardan birinə çevirir.
Bazar məktəbinin şagirdləri müəllimləri və valideynləri ilə birlikdə, bələdçinin müşayiəti altında qədim şəhərin küçələrində gəzərək onun memarlıq irsi və görməli yerləri ilə tanış olublar. Onlar dünyada yeganə olan Miniatür Kitab Muzeyini, tanınmış Azərbaycan rəssamı Əli Şəmsinin emalatxanasını ziyarət edib, həmçinin Bakı şəhərinin səmavi himayədarı müqəddəs həvari Bartalmayın Qız qalasının ətəyində yerləşən şəhidlik yerini ziyarət ediblər. Uşaqlar üçün ekskursiya Bakı Yeparxiyasının zəvvarlıq üzrə şöbəsi  tərəfindən təşkil olunub.