Polşa ruhanilərindən ibarət nümayəndə heyəti Bakının Ali-Mələk Mikayıl kilsəsini ziyarət edib

Varşava Ali İlahiyyat Seminariyasının rektoru, monsenyor Voyçex Bartkoviçin rəhbərlik etdiyi Polşa ruhanilərindən ibarət nümayəndə heyəti Bakının Ali-Mələk Mikayıl kilsəsini ziyarət edib. Kilsənin baş keşişi, protoiyerey Mefodiy Əfəndiyev qonaqları salamlayaraq onlara Bakı yeparxiyasının ən qədim kilsəsinin tarixindən, kilsənin müasir dövrdə həyatından danışıb. Nümayəndə heyətinin üzvləri, həmçinin Ali-Mələk Mikayıl kilsə kompleksinə daxil olan Müqəddəs Bartalmay (Varfolomey) kilsəsinə də baş çəkmiş, burada saxlanılan mqd. Bartalmayın mübarək cisminin qalıqlarına ehtiram etmək imkanı əldə etmişlər.

Multikulturalizmin Azərbaycan modeli və ölkədə dinlərarası dialoqun səviyyəsi ilə tanışlıq məqsədi daşıyan Polşa nümayəndə heyətinin Azərbaycana sentyabrın 7-dən 14-dək baş tutan səfəri Dini Qurumlarla İş üzrə Dövlət Komitəsi, Azərbaycanın Polşadakı səfirliyi və “Həyat Sözü” xristian dini icması tərəfindən təşkil olunmuşdur.