Sentyabrın 27-si Azərbaycanda Anım Günü qeyd edilir

Sentyabrın 27-si, Azərbaycan Prezidenti İlham Əliyevin 2 dekabr 2020-ci il tarixli Sərəncamına əsasən, Azərbaycanda Anım Günü qeyd edilir. Prezidentin Sərəncamında qeyd edildiyi kimi, bu anım tarixi “Əsgər və zabitlərimizə, Vətən müharibəsində qəhrəmancasına döyüşmüş, ölkəmizin ərazi bütövlüyü uğrunda canlarından keçmiş bütün şəhidlərimizə dərin ehtiram əlaməti olaraq təsis edilib." Bu gün Azərbaycanın dini icmaları Vətənin ərazi bütövlüyü uğrunda canlarından keçmiş şəhidlərin xatirəsini ehtiramla yad ediblər.

Anım günü ərəfəsində Şeyxülislam A.Paşazadə başda olmaqla ənənəvi dinlərin rəhbərləri və nümayəndələri İkinci Şəhidlər Xiyabanını ziyarət edib, burada şəhid olan əsgərlərin xatirəsini ehtiramla yad edib, məzarları önünə gül dəstələri düzüblər. Sentyabrın 27-də Bakı yeparxiyasının mətbuat katibi, protoiyerey Konstantin Pominov əsgər Dmitri Solntsevin məzarı önündə anım mərasimi - mərhumlar üçün litiya dua ayinini keçirib.

Yasamal Rayon İcra Hakimiyyətinin təşkilatçılığı ilə keçirilən anım tədbirində Bakının Ali-Mələk Mikayıl kilsəsinin baş keşişi, protoiyerey Mefodiy Əfəndiyev iştirak edib.