Uşaq bazar məktəbinin şagirdləri Tolerantlıq Evini ziyarət ediblər

İyulun 19-da Bakı şəhəri Ali-Mələk Mikayıl kilsəsinin uşaq bazar məktəbinin şagirdləri müəllimləri və valideynlərinin müşayiəti ilə Azərbaycanın paytaxtının mərkəzində — İçərişəhərdə yerləşən Tolerantlıq Evini (Muzeyini) ziyarət ediblər. Tolerantlıq Evi mədəniyyətlərarası və dinlərarası dialoqun inkişafına xidmət edən mədəni-maarif mərkəzidir. Tolerantlıq Evi Qafqaz Müsəlmanları İdarəsinin sədri, Şeyxülislam Allahşükür Paşazadənin təşəbbüsü və Azərbaycan Respublikasının Birinci vitse-prezidenti Mehriban Əliyevanın hərtərəfli dəstəyi ilə yaradılıb. Muzey Prezident İlham Əliyevin rəhbərliyi ilə uğurla həyata keçirilən dövlət siyasətinin mühüm istiqamətlərindən biri olan Azərbaycan multikulturalizm modelinin parlaq nümunəsidir.

Gənc ziyarətçilər üçün təşkil olunan ekskursiya zamanı onlara Tolerantlıq Evinin fəaliyyəti, əsrlər boyu ölkə ərazisində mövcud olan ənənəvi dini icmalar və bu icmalar arasında formalaşmış xoş münasibətlər barədə ətraflı məlumat verilib. Uşaqlar ölkənin dini icmalarının dəstəyi ilə yaradılmış muzeyin nadir ekspozisiyası ilə böyük diqqətlə tanış olublar. Şeyxülislam Allahşükür Paşazadənin muzeyə təqdim etdiyi eksponatlar xüsusilə böyük maraq doğurub. Onun şəxsi nümunəsi qarşılıqlı hörmət, anlaşma və etimada əsaslanan qardaşlıq münasibətlərinin müxtəlif dinlərin nümayəndələri arasında qurulmasının mümkünlüyünü aydın şəkildə göstərir. Ekskursiyadan sonra bazar məktəbinin şagirdləri onları maraqlandıran çoxsaylı suallar veriblər.