Azərbaycanda Belarus Respublikasının mədəniyyət günləri keçirilir

Aprelin 1-dən 4-dək Azərbaycanın paytaxtında Belarus Respublikasının mədəniyyət günləri keçirilir. Mədəniyyət günlərinin təntənəli açılışı aprelin 2-də Heydər Əliyev Sarayında olub. Azərbaycan və Belarusun mədəniyyət nazirləri Adıl Kərimli və Anatoliy Markeviç konsert zalına toplaşanların qarşısında çıxış ediblər. Tədbir qala-konsertlə davam edib. Sarayın foyesində Belarus tətbiqi sənətinin nümunələrini nümayiş etdirən sərgi də tamaşaçıların diqqətinə çatdırılıb.

Belarus mədəniyyəti günləri çərçivəsində Bakıda “Belarusfilm” kinostudiyasının istehsalı olan bədii və sənədli filmlərin nümayişi keçiriləcək. Azərbaycan Milli İncəsənət Muzeyində Belarus Respublikası Milli İncəsənət Muzeyinin “Belarus rəssamların gözü ilə” adlı sərgisi açılıb. M. F. Axundzadə adına Azərbaycan Milli Kitabxanasında Azərbaycan və Belarus mədəniyyət xadimlərinin iştirakı ilə dəyirmi masa keçiriləcək.

Belarusun Azərbaycanda keçirilən mədəniyyət günlərinin açılış mərasimində Bakı Yeparxiyasının din xadimləri və Yeparxiya idarəsinin əməkdaşları iştirak ediblər.