Yepiskop Aleksiy Romada Qafqaz Müsəlmanları İdarəsinin təşəbbüsü ilə keçirilən iftarda iştirak edib

Martın 9-da Romada Qafqaz Müsəlmanları İdarəsinin, Azərbaycan Respublikasının Müqəddəs Taxt-Tacdakı səfirliyinin təşəbbüsü, Mərakeş Krallığının Müqəddəs Taxt-Tacdakı səfirliyinin və Beynəlxalq Media Kommunikasiya Klubunun iştirakı ilə iftar mərasimi keçirilib. Tədbir geosiyasi qarşıdurmaların, humanitar böhranların və müharibələrin yaşandığı bir dövrdə xüsusilə aktual olan dinlərarası dialoq və əməkdaşlığın möhkəmləndirilməsinə Azərbaycan dövlətinin növbəti töhfəsi kimi qiymətləndirilib.

İftar mərasimində Müqəddəs Taxt-Tacın Dövlət katibi kardinal Pietro Parolin, Azərbaycanın dini konfessiyalarının rəhbərləri – Qafqaz Müsəlmanları İdarəsinin sədri şeyxülislam Allahşükür Paşazadə, Bakı və Azərbaycan yepiskopu Aleksiy, Azərbaycanda Katolik Kilsəsinin apostol prefekti yepiskop Vladimir Fekete, Alban-udi xristian icmasının sədri Robert Mobili, Bakı Avropa yəhudiləri icmasının sədri Aleksandr Şarovski, Azərbaycanın Müqəddəs Taxt-Tacdakı səfiri İlqar Muxtarov, Mərakeşin Müqəddəs Taxt-Tacdakı səfiri Racaə Naci, Beynəlxalq Media Kommunikasiya Klubunun baş katibi Nizar Ramazan, həmçinin İtaliyada və Müqəddəs Taxt-Tacda akkreditə olunmuş diplomatik missiyaların nümayəndələri, dövlət, dini və ictimai xadimlər iştirak ediblər.