Roma Papası Fransiskin Qazaxıstana rəsmi dövlət və apostol səfəri başlayıb

Roma Papası Fransiskin Qazaxıstana rəsmi dövlət və apostol (həvari) səfəri başlayıb. Papanın səfər proqramında ölkə rəhbərliyi ilə yüksək səviyyəli görüşlər, Qazaxıstanın paytaxtında açılacaq Dünya və Ənənəvi Dinlər Liderlərinin VII Qurultayında iştirak, həmçinin ölkədə və bütün Orta Asiya regionunda yaşayan katoliklər üçün Liturgiya nəzərdə tutulub. Nursultan şəhərində olduğu ilk gün Papa Fransisk “Qazaq” dövlət zalında Qazaxıstan Prezidenti Kasım-Jomrat Tokayevin iştirakı ilə, Qazaxıstan hökumətinin üzvləri, senatorlar, diplomatik korpus, ictimaiyyətin nümayəndələri və Qurultay iştirakçıları ilə görüşüb, onlara müraciət edib. Tədbirə dəvət olunanlar sırasında Bakı və Azərbaycan yeparxiyasının katibi arximandrit Aleksiy (Nikonorov) da var idi.