Pravoslav gənclər Lənkərandakı Allahın Əqdəs Validəsinin Dua Örpəyi kilsəsini ziyarət ediblər

Bakı Yeparxiyasının zəvvarlıq şöbəsinin təşkilatçılığı ilə pravoslav gənclər üçün yeparxiyanın ən cənub prixodu olan Lənkəran şəhəri Allahın Əqdəs Validəsinin Dua Örpəyi kilsəsinə səfər təşkil olunub. Ziyarətçilər İlahi Liturgiyada iştirak ediblər. İbadətdən sonra gənclər səmimi şəraitdə çay süfrəsi arxasında kilsənin baş keşişi protoiyerey Aleksandr Astaşkin, həmçinin qrupu müşayiət edən Bakı Yeparxiyasının zəvvarlıq şöbəsinin rəhbəri protoiyerey Dionisiy Sveçnikov və protodiakon Vadim Tokarevlə söhbət etmək imkanı əldə ediblər.
Səfər çərçivəsində gənclər Lənkəran və Lerik rayonlarının füsunkar təbiəti ilə tanış olub, Lerik şəhərində Etnoqrafiya Muzeyini və dünyada yeganə olan Uzunömürlülər Muzeyini də ziyarət ediblər.