Yepiskop Aleksiy Müqəddəs Taxt-Tacın Dinlərarası Dialoq üzrə Dikasteriyasının prefekti ilə keçirilən görüşdə iştirak edib

Bakı Tolerantlıq Evində Azərbaycanın dini liderlərinin Müqəddəs Taxt-Tacın Dinlərarası Dialoq üzrə Dikasteriyasının prefekti kardinal Corc Ceykob Kuvakad ilə görüşü keçirilib. Görüş iştirakçıları Tolerantlıq Evinin ekspozisiyası ilə tanış olublar. Ekspozisiyada Azərbaycanda ənənəvi olaraq fəaliyyət göstərən müsəlman, xristian və yəhudi icmalarının tarixi və fəaliyyətini əks etdirən müxtəlif eksponatlar nümayiş olunur. Söhbət zamanı Qafqaz Müsəlmanları İdarəsinin sədri şeyxülislam Allahşükür Paşazadə kardinal Kuvakada Azərbaycanda həyata keçirilən multikulturalizm və tolerantlıq siyasəti barədə məlumat verib. Bildirib ki, bu siyasətin əsasları Azərbaycan xalqının Ümummilli Lideri Heydər Əliyev tərəfindən qoyulub və ölkənin indiki rəhbərliyi tərəfindən uğurla davam etdirilir. Şeyxülislam həmçinin Azərbaycanda ənənəvi dini icmaların rəhbərləri və nümayəndələri arasında mövcud olan dinlərarası dialoqun və konstruktiv əməkdaşlığın yüksək səviyyəsini xüsusi vurğulayıb. Görüşün sonunda tərəflər bir-birilərinə xatirə hədiyyələri təqdim ediblər. Kardinal Kuvakad Tolerantlıq Evinin Fəxri Qonaqlar Kitabına ürək sözlərini yazıb.