Qafqaz Müsəlmanları İdarəsinin sədri ilə Moskva Patriarxlığının Xarici Kilsə Əlaqələri İdarəsinin sədri görüş keçirilib

Qazaxıstanın paytaxtı Nur-Sultan şəhərində bu günlərdə keçirilən Dünya və Ənənəvi Dinlər Liderlərinin VII Qurultayı çərçivəsində Qafqaz Müsəlmanları İdarəsinin sədri Şeyxülislam A.Paşazadə ilə Moskva Patriarxlığının Xarici Kilsə Əlaqələri İdarəsinin sədri, Volokolamsk mitropoliti Antoniy arasında görüş keçirilib.

Mitropolit Antonini yeni vəzifəsində- Rus Pravoslav Kilsəsinin diplomatik şöbəsinin rəhbəri kimi salamlayan şeyxülislam, Moskva və Bütün Rusiyanın Patriarxı Kiril həzrətlərinə səmimi salamlarının çatdırılmasını xahiş etdi və Rus Pravoslav Kilsəsi ilə Qafqaz Müsəlmanları İdarəsinin xalqlar və dinlər arası sülh və qarşılıqlı anlaşma naminə əməkdaşlığının bundan öncə olduğu kimi sıx və məhsuldar olacağına ümidvar olduğunu bildirdi.

Mitropolit Antoniy öz növbəsində, Qafqaz Müsəlmanları dini liderinə Rus Kilsəsi Başçısının xoş arzularını çatdırıb və dinlərarası dialoqun inkişafı üçün birgə fəaliyyətə hazır olduğunu bildirib.

Görüşdə Bakı və Azərbaycan yeparxiyasının katibi arximandrit Aleksiy (Nikonorov) iştirak etmişdir.