İslam icmasının dini lideri Şeyxülislam Allahşükür Paşazadə ilə Rusiya Federasiyasının Azərbaycan Respublikasındakı səfiri M.N.Boçarnikov arasında görüş keçirilib

Qafqaz Müsəlmanları İdarəsində Azərbaycan islam icmasının dini lideri Şeyxülislam Allahşükür Paşazadə ilə Rusiya Federasiyasının Azərbaycan Respublikasındakı Fövqəladə və Səlahiyyətli səfiri M.N.Boçarnikov arasında  görüş keçirilib. 
Görüşdə həmçinin Bakı Yeparxiya İdarəsinin katibi arximandrit Aleksiy (Nikonorov) iştirak edib. 

Şeyxülislam səfirə bu yaxınlarda Rus Pravoslav Kilsəsinin Başçısı ilə görüşü, o cümlədən Moskvada keçirilən İslam Forumu barəsində məlumat verib.  Söhbət zamanı Cənubi Qafqazda millətlərarası və dinlərarası münasibətlərə dair gündəmdə olan məsələlər və gərginlik yaradan vəziyyətlərin sakitləşdirilməsində dini liderlərin rolu müzakirə olunub.
A.Paşazadə dini liderlərin və onların rəhbərlik etdikləri icmaların bütün kəskin siyasi məsələlərin və münaqişələrin sülh yolu ilə həllinə sadiq olduqlarını vurğulayıb.  Söhbət zamanı qarşılıqlı maraq doğuran digər məsələlərə də toxunulub.