Pyatiqorsk və Çərkəz arxiyepiskopu Feofilakt Yeparxiya Şurasının iclasına başçılıq edib

Bakı və Azərbaycan Yeparxiyasının rəhbəri vəzifəsini müvəqqəti icra edən Pyatiqorsk və Çərkəz arxiyepiskopu Feofilakt Yeparxiya Şurasının iclasına başçılıq edib. Bakı Yeparxiyasının Dini-Mədəni Mərkəzinin konfrans zalında keçirilən iclasda arxiyerey ötən ilin yekunlarına dair hesabat məruzəsi ilə çıxış edib.

Bu gün Bakı yeparxiyasında 7 prixod və 2 ibadətgah mövcuddur. Yeparxiyada 34 ruhani xidmət edir ki, onlardan 21-i keşiş, 13-ü diakondur. İclas iştirakçıları qarşısında çıxış edən arxiyepiskop Feofilakt paytaxtın iki kilsəsi - Məryəm Ananın Mövludu və Ali-Mələk Mikayıl kilsələrində genişmiqyaslı təmir-bərpa işlərinin başa çatdırılmasını, eləcə də Lənkəran şəhərinin Məryəmin Dua Örpəyi prixodunda tam liturgiya həyatının başlanmasını ötən ilin ən mühüm hadisələri adlandırıb. Arxiyerey pandemiyadan sonrakı dövrdə ibadət və prixod həyatının normallaşlmasına, uşaqlar və böyüklər üçün bazar günü məktəblərinin açılmasına, yeparxiya idarəsinin əməkdaşlarının və Bakı yeparxiyasının ruhanilərinin ölkənin sosial və mədəni həyatında iştirak etmələrinə xüsusi diqqət yetirib.  Feofilakt həzrətləri bəzi yeparxiya strukturlarının işində müsbət dəyişiklikləri də qeyd edib.  Arxiyerey yeparxiyanın dövlət orqanları, dini və ictimai təşkilatlarla qarşılıqlı fəaliyyətindən danışıb.

Arxiyepiskopun hesabatında yeparxiya idarələrinin və komissiyalarının işi öz əksini tapıb. Feofilakt həzrətləri Yeparxiya İdarəsinin illik fəaliyyətinin nəticələrini təqdim edib. 

İclasın sonunda arxipastır iştirakçıların suallarını cavablandırıb və yeni 2023-cü ilin başlanması münasibətilə tədbir iştirakçılarına xeyir-dua və nəsihətlər verib.