Qafqaz Müsəlmanları İdarəsinin Sədri Şeyx-ül-islam Allahşükür Paşazadə həzrətlərinin Milad bayramı münasibətilə Təbriki

Bir Olan Yaradanın adı ilə!

Sizi və Azərbaycanda yaşayan bütün Rus-Pravoslav Kilsəsinin övladlarını nurlu Milad və Yeni İl bayramı münasibətilə müsəlmanlar adından və şəxsən öz adımdan ürəkdən təbrik edirəm.

Milad sülh, mərhəmət, qardaş sevgisi bayramıdır. Ona görə də bu bayram Azərbaycan xalqı üçün xüsusilə əzizdir, çünki Azərbaycanda müxtəlif millətlərin və dinlərin nümayəndələri arasında qarşılıqlı hörmət tarixi ənənə və həyat normasıdır.

Milli və dini mənsubiyyətimizdən asılı olmayaraq bir Yaradanın məxluqları olduğumuzdan çıxış edərək, bu nurlu bayram münasibətilə Sizin sevincinizə bütün qəlbimizlə qatılır, bayram sevincini pravoslav bacı-qardaşlarla bölüşürük. Qoy Uca Allah bizi bir birimizə yaxınlaşdıran və birləşdirən hər amilin qorunub saxlanılması və layiqincə inkişafı naminə səylərimizə xeyir-dua versin.

Bir daha Sizi və Azərbaycanda yaşayan bütün pravoslav xristianlarını nurlu və sevinc olu Milad Bayramı münasibətilə ürəkdən təbrik edirəm. Arzumdur ki, O Bir Olan Yaradan hər birinizə və ailələrinizə əmin-amanlıq, firavanlıq, xoşbəxtlik nəsib etsin.

Əs-Səlamu əleykum və rahmətullahi və bərakətuh

Dərin hörmətlə,

Şeyx-ül-islam Allahşükür Paşazadə