Radonitsa - mərhumların ümumkilsə səviyyəsində keçirilən xüsusi anım günüdür

Radonitsa - Pasxadan sonra 9-cu gün qeyd olunan mərhumların ümumkilsə səviyyəsində keçirilən xüsusi anım günüdür. Bu bayram Pasxanın Allahın ölüm üzərində qələbəsi olduğunu xatırladır və biz də həmin gün bu sevinci mərhum yaxınlarımızla bölüşürük. Kilsə ənənəsinə görə, pravoslav xristianlar bu gün doğmalarının məzarlarını ziyarət edərək, onların əbədi hüzura qovuşmaları üçün dua edirlər.

Bakı Yeparxiyasının katibi arximandrit Aleksiy (Nikonorov) bərpa edilmiş Bakı Yeparxiyasının birinci arxiyereyi (başçısı)- arxiyepiskop Aleksandrın Fəxri xiyabanda məzarı, Bakı ruhanilərinin Çəmbərəkənd qəbiristanlığında olan məzarları, eləcə də şəhidlər Yuriy Kovalev və Dmitriy Solntsevin məzarları qarşısında litiya ibadətini (mərhumlar üçün dua) keçirmişdir.

Ümumilikdə Bakı yeparxiyasının ruhaniləri Azərbaycanın 30 pravoslav qəbiristanlığında mərhumlar üçün dua mərasimləri keçiriblər.