Qafqaz Müsəlmanlarının başçısı Kazan mitropoliti və Pyatiqorsk arxiyepiskopunu qəbul edib

Qafqaz Müsəlmanları İdarəsinin sədri Şeyxülislam Allahşükür Paşazadə Kazan və Tatarıstan mitropoliti Kirill və Pyatiqorsk və Çərkəz arxiyepiskopu Feofilakt ilə görüşüb. Qafqaz Müsəlmanlarının başçısı həvari Bartalmayın şərəfinə keçirilən yeparxiya bayramı münasibətilə Bakıya gəlmiş hörmətli qonaqları salamlayaraq, bu yaxınlarda Kazanda keçirilən Beynəlxalq İslam Forumu çərçivəsində Rus Pravoslav Kilsəsinin başçısı ilə keçirdiyi görüşü xatırladıb. Şeyxülislam həzrətləri həmçinin ölkədə və dünyada dinlərarası münasibətlərlə bağlı fikirlərini bölüşüb. Arxiyereylər öz növbəsində Bakıya Azərbaycanın ümummilli lider Heydər Əliyevin 100 illik yubileyinin qeyd edildiyi bir vaxtda gəldiklərini və səfərə onun dəfn olunduğu yerə gül dəstələri qoymaqla başladıqlarını qeyd ediblər. Qonaqlar, həmçinin Azərbaycana xas olan xüsusi tolerantlıq mühitini qeyd edərək, ölkə Prezidenti İlham Əliyevin ənənəvi dinlərin dəstəklənməsində xüsusi rolunu və pravoslav kilsələrinə xüsusi qayğısını qeyd ediblər.