Pyatiqorsk və Çərkəz arxiyepiskopu Feofilakt Qafqaz Müsəlmanlarının Başçısı ilə görüşüb

Qafqaz Müsəlmanları İdarəsində Azərbaycanda  arxipastır səfərində olan Bakı və Azərbaycan Yeparxiyasının rəhbəri vəzifəsini müvəqqəti icra edən Pyatiqorsk və Çərkəz arxiyepiskopu Feofilaktın Qafqaz Müsəlmanları İdarəsinin sədri Şeyxülislam Allahşükür Paşazadə ilə  görüşü keçirilib.
Görüş zamanı Şeyxülislam həzrətləri QMİ ilə Rus Pravoslav Kilsəsi arasında əlaqələrin səviyyəsini yüksək qiymətləndirib. Müsəlmanların Başçısı Ermənistan-Azərbaycan münaqişəsinin həllində Moskva və Bütün Rusiyanın Patriarxı Kirill müqəddəslərinin vasitəçilik missiyasını xüsusi qeyd edərək, atılan birgə addımlar nəticəsində problemin dini səviyyəyə keçməsinin qarşısı alınmasının mümkün olduğunu vurğulayıb.
Allahşükür Paşazadə qonaqdan Patriarx müqəddəslərinə patriarx taxtına çıxmasının 15-ci ildönümü münasibətilə təbrik və salamlarını çatdırmağı xahiş edib.
Arxiyepiskop Feofilakt fevralın 7-də keçirilmiş prezident seçkiləri münasibətilə Azərbaycan xalqını təbrik edib, Azərbaycan Respublikasının Prezidenti İlham Əliyevə uğurlar arzulayıb. Feofilakt həzrətləri dövlət başçısının bundan sonra da Azərbaycan dövlətinin daha da möhkəmlənməsi və burada yaşayan bütün xalqların rifahı naminə yorulmadan çalışacağından əmin olduğunu bildirib. 
Görüş zamanı qarşılıqlı maraq doğuran digər məsələlər müzakirə olunub.