Bakıda “Dinlərarası harmoniya” festivalı keçirilib

Martın 8-də Bakıda «Passage 1901» pavilyonunda «Dinlərarası Harmoniya» festivalının açılışı olub. Tədbir Azərbaycanda fəaliyyət göstərən dini icmalar tərəfindən təşkil edilib.

Festivalın açılışında Azərbaycan Respublikası Dini Qurumlarla İş üzrə Dövlət Komitəsinin sədri vəzifəsini müvəqqəti icra edən Səyyad Salahlı tədbir iştirakçılarını salamlayıb. Nümayiş olunan xüsusi hazırlanmış stendlər vasitəsilə paytaxtın sakinləri və qonaqları dini icmaların tarixi və müasir həyatı ilə yaxından tanış olublar, icma nümayəndələri ilə ünsiyyət qurmaq imkanı əldə ediblər. Bu günlərdə Bakıda keçirilən “Müxtəlifliyin qorunması: 2024-cü ildə islamofobiya ilə mübarizə” mövzusunda beynəlxalq konfransın iştirakçıları festivalın fəxri qonaqları olub. 

Tədbirin qonaqlarına multikulturalizmin Azərbaycan modelini əks etdirən videoçarxlar və dini icmalar tərəfindən hazırlanmış musiqili proqram təqdim olunub. Pravoslav ilahilər Kristina Əfəndiyevanın rəhbərliyi altında Bakı şəhəri Ali-Mələk Mikayıl kilsəsinin xoru tərəfindən ifa olunub.

Bakı Yeparxiyasını tədbirdə Yeparxiyanın ictimai təşkilatlarla qarşılıqlı əlaqələr şöbəsinin rəhbəri protoiyerey Mefodiy Əfəndiyev və Yeparxiya ruhaniləri iyerey Rostislav Şahvələdov və diakon Rustik Şerstnev təmsil ediblər.