Şuşada dini liderlərin görüşü keçirilib

Mayın 1-3-də Azərbaycanda VI Ümumdünya Mədəniyyətlərarası Dialoq Forumu keçirilir. Forum çərçivəsində Azərbaycanın mədəniyyət paytaxtı olan Şuşa şəhərində “Dinlərarası dialoq vasitəsilə etimadın möhkəmləndirilməsi” mövzusunda dini liderlərin görüşü keçirilib. Tədbir Azərbaycan Respublikası hökuməti, Qafqaz Müsəlmanları İdarəsi, BMT-nin Sivilizasiyalar Alyansı və İSESCO tərəfindən təşkil olunub. Tədbirdə Qafqaz Müsəlmanları İdarəsinin sədri Şeyxülislam Allahşükür Paşazadə, BMT-nin Sivilizasiyalar Alyansı üzrə baş katibinin nümayəndəsi Migel Anxel Moratinos, Azərbaycan Respublikasının Dini Qurumlarla İş üzrə Dövlət Komitəsinin sədri Ramin Məmmədov və dünyanın bir çox ölkələrindən dini liderlər iştirak ediblər. Görüşün yekunu olaraq Dini Liderlərin Şuşa Bəyannaməsi qəbul edilib. Bakı Yeparxiyasını tədbirdə Yeparxiya İdarəsinin katibi protoiyerey Dionisiy Sveçnikov təmsil edib.

Həmin gün forum iştirakçıları Şuşa şəhərinin görməli yerlərində olmuş, Qarabağ iqtisadi rayonunda aparılan genişmiqyaslı tikinti və təmir-bərpa işləri ilə tanış olmuş, Xankəndi, Xocalı və Ağdam şəhərlərinə səfər etmişlər.