Yepiskop Aleksiy və arxiyepiskop Feofilakt Müqəddəs Mürr-Daşıyan Zənənlər kafedral kilsəsində İlahi Liturgiya ibadətini keçiriblər

Bakı və Azərbaycan yepiskopu Aleksiy və Pyatiqorsk və Çərkəz arxiyepiskopu Feofilakt Bakı şəhəri Müqəddəs Mürr-Daşıyan Zənənlər kafedral kilsəsində İlahi Liturgiya ibadətini keçiriblər. İbadət zamanı arxiyereyləri paytaxt kilsələrin baş keşişləri, Svetloqrad şəhəri Ali Həvarilər Peter və Paul adına monastırın baş keşişi iqumen Kirill (Nikitin) və Bakı yeparxiyasının ruhaniləri müşayiət ediblər. Liturgiyanın sonunda 2021-2024-cü illərdə Bakı Yeparxiyasının rəhbəri vəzifəsini müvəqqəti icra edən arxiyepiskop Feofilakt kilsədə toplaşanlara Bakı və Azərbaycanın yeni yepiskopunu təqdim etdi. Yepiskop Aleksiy arxiyepiskop Feofilakta Azərbaycan torpağında pravoslav kilsəsinin rihafı naminə gördüyü işlərə görə təşəkkürünü bildirərək, ibadət iştirakçılarına salamlama nitqi ilə müraciət etdi.

İbadətdə Rusiya Federasiyasının Azərbaycan Respublikasındakı fövqəladə və səlahiyyətli səfiri M. N. Yevdokimov, Belarus Respublikasının fövqəladə və səlahiyyətli səfiri A. A. Ravkov, Rusiya və Belarus səfirliklərinin əməkdaşları, Azərbaycan Respublikasının Dini Qurumlarla İş üzrə Dövlət Komitəsinin nümayəndəsi iştirak etmişlər.