Yepiskop Aleksiy Xaçmaz şəhəri Müqəddəs Ecazkar Nikolay kilsəsində İlahi Liturgiya keçirib

Bakı və Azərbaycan yepiskopu Aleksiy Xaçmaz şəhərinə arxpastır səfəri edib. Bu, arxiyepiskop Aleksandrın (İşeinin) vəfatından sonra son 4 ildə Azərbaycanın şimal bölgəsinə edilən ilk arxiyerey səfəridir. Yepiskop Aleksiy Xaçmaz şəhəri Müqəddəs Ecazkar Nikolay kilsəsində İlahi Liturgiyaya başçılıq edib. Arxiyereyi Bakı Yeparxiya İdarəsinin katibi protoiyerey Dionisiy Sveçnikov, iqumen Kirill (Nikitin) və Müqəddəs Nikolay prixodunun baş keşişi iyeromonax Georgiy (Budaqov) müşayiət ediblər. İbadət ilahiləri Nelli İsrafilovanın rəhbərliyi altında Bakı kafedral kilsəsinin xoru tərəfindən ifa edilib. Liturgiya zamanı Xaçmaz sakinləri və Bakıdan gələn zəvvarlar dua ediblər. Liturgiyanın sonunda yepiskop Aleksiy toplaşanlara Allaha Onun verdiyi bütün nemətlərə görə şükür etməyin vacibliyi haqqında nəsihətlə müraciət etdi. 
İbadətdən sonra yepiskop Aleksiy Xaçmaz Rayon İcra Hakimiyyətinin ictimai-siyasi və humanitar məsələlər şöbəsinin müdir müavini Ceyhun Musayev və Qafqaz Müsəlmanları İdarəsinin Xaçmaz rayon qazısı Yaşar Rzayevlə görüşüb.