Bazar günü məktəblərinin şagirdləri Şamaxı rayonunda olublar

Dərs ilinin sonunda Bakı yeparxiyası kilsələrinin bazar günü məktəblərinin şagirdləri üçün Şamaxı rayonuna maarifləndirici səyahət təşkil olunub. Uşaqlar müəllim və valideynlərin müşayiəti ilə Azərbaycan Milli Elmlər Akademiyasının Nəsrəddin Tusi adına Şamaxı Astrofizika Rəsədxanasında olublar. Dəniz səviyyəsindən 1500 metr yüksəklikdə yerləşən rəsədxana gecə-gündüz ziyarətçiləri qəbul edir. Uşaqlar muzeyin eksponatları və regionun ən böyük teleskopu ilə tanış olmaq imkanı əldə ediblər.

Ekskursiya proqramı Heydər Əliyev Fondunun təşəbbüsü ilə 2018-ci ildə inşa edilmiş Dəmirçi kənd Arxeologiya Muzeyində davam etdirilib. Muzeydə Şamaxı rayonunda aparılan arxeoloji qazıntılar zamanı aşkar edilmiş maddi mədəniyyət nümunələri, nadir daş alətlər, əmək alətləri, soyuq silahlar, sikkələr, gil məmulatlar və digər qiymətli tapıntılar nümayiş etdirilir. Dəmirçi kəndi Azərbaycanın çoxəsrlik dəmirçilik ənənələri yaşadan guşələrindən biridir. Bazar günü məktəbinin şagirdləri xalq sənətkarlarının emalatxanalarında olub, onların işləri ilə tanış olublar.

Səfər Bakı Yeparxiyasının zəvvarlıq və katexizasiya şöbələri tərəfindən təşkil olunub.