Bakı Rus Evində pravoslav ikonaların sərgisi açılıb

Bakı şəhəri Rus Evində qədim və müasir ikonalardan ibarət sərgi açılıb.  Sərgidə paytaxtın pravoslav kilsələrində saxlanılan, eləcə də şəxsi istifadədə olan ikonalar nümayiş etdirilir. 
Bakı Rus Evinin rəhbər müavini Dmitriy Yeqorov qonaqları salamlayıb.  Bakı Yeparxiyasının İctimai təşkilatlarla qarşılıqlı əlaqələr şöbəsinin rəhbəri protoiyerey Mefodiy Əfəndiyev ikonanın pravoslav ənənəsində xüsusi yerindən danışıb.  Bakı şəhəri Ali-Mələk Mikayıl kilsəsinin rəssamı və bərpaçısı İnna Bəşirova ikona təsviri sənətin yaranması və inkişafı mövzusunda qısa mühazirə ilə çıxış edib.
Sərginin açılışı çərçivəsində kilsə ilahilərindən ibarət konsert təşkil olundu.  Kristina Əfəndiyevanın rəhbərlik etdiyi Bakı şəhəri Ali-Mələk Mikayıl kilsəsinin xorun ifasında Böyük Orucun ilahiləri səsləndirildi.  Konsertin aparıcısı, sənətşünaslıq üzrə fəlsəfə doktoru Alyona İnyakina hər bir musiqi əsərindən əvvəl çıxış edərək əsərə xas olan dərin mənəvi-əxlaqi mənadan, onun Əhdi-Ətiq və Əhdi-Cədid tarixi ilə bağlılığından danışıb.
Bakı Yeparxiyasının Bakı Rus Evi ilə birgə təşkil etdiyi tədbirdə Rusiya Federasiyası və Belarus Respublikasının səfirliklərinin əməkdaşları, ictimaiyyət nümayəndələri, paytaxtın sakinləri və qonaqları iştirak ediblər.  Tədbir iştirakçıları “Crocus City Hall”da baş vermiş terror aktı nəticəsində həlak olanların xatirəsini bir dəqiqəlik sükutla yad etmiş, xorun ifasında “Əbədi Xatirə” ilahisi ifa edilmişdir.