Moskvada Hacı Zeynalabdin Tağıyevin xatirəsi alınıb

Aprelin 19-da Dövlət Şərq Muzeyində (Moskva) Azərbaycan xalqının görkəmli oğlu - XX əsrin əvvəllərinin sənaye xadimi və xeyriyyəçisi, Rusiya İmperiyasının müşaviri Hacı Zeynalabdin Tağıyevin xatirəsinə həsr olunmuş gecə keçirilib.

Tədbiri Şərq Muzeyinin direktoru, tarix elmləri doktoru Aleksandr Sedov açaraq qeyd edib ki, bəşər tarixində himayədarlıq və xeyriyyəçilik həmişə nəcib əməl kimi qiymətləndirilib. Belə insanların xidmətləri sonrakı nəsillərə örnəkdir. “Bu gün biz belə bir insanı - 100 il əvvəl dünyasını dəyişmiş Zeynalabdin Tağıyevi xatırlayırıq”, - deyə A.Sedov bildirib.

Tarix elmləri namizədi, ilahiyyat elmləri namizədi, Moskva Dövlət Linqvistik Universitetinin dosenti, iyerey Dmitriy Safonov “Azərbaycanda pravoslav-islam əməkdaşlığı ənənələrinin formalaşmasında Z.Tağıyevin töhfəsi” mövzusunda məruzə ilə çıxış edib. O, məruzəsində Z.Tağıyevin 1870-ci illərdə Bakıda mqd. Aleksandr Nevskiy kafedral kilsəsinin tikintisində iştirakına dair bir sıra tarixi faktlar gətirdi. Həmçinin ata Dmitriy Rus Pravoslav Kilsəsinin Azərbaycanın müsəlman icması ilə dialoqundan, ölkədə multikulturalizm və tolerantlıq siyasətinin həyata keçirilməsində kilsənin iştirakından danışıb. Məruzənin sonunda o, Bakıda keçirilən dinlərarası forumlarda iştirakı, Moskva və Bütün Rusiyanın Patriarxı Kirillə Qafqaz müsəlmanlarının başçısı Şeyxülislam Allahşükür Paşazadə arasında görüşlərin təşkili ilə bağlı şəxsi təəssüratlarını bölüşüb.