Bakının kafedral kilsəsində taxt-tac bayramı keçirilib

Pasxa bayramından sonra 3-cü Rəbb günündə Kilsə Xilaskarın məzarına ilk gələn və Məsihin Dirilməsi xəbərini eşidən müqəddəs Mürr-Daşıyan Zənənləri izzətləndirir. Bu il 115 illiyi qeyd edilən Bakı şəhəri Müqəddəs Mürr-Daşıyan Zənənlər kafedral kilsəsində bu gün kilsənin tax-tac bayramı keçirilib.

Bakı Yeparxiyasının baş kilsəsi 1909-cu ildə həmin illərdə Bakıda yerləşən 262-ci Salyan piyada alayının ehtiyacları üçün memar F.M.Verjbitskiy tərəfindən hərbi kilsələrin nümunəvi layihəsi əsasında tikilmişdir. Sovet dövründə kilsə 1920-ci ildə ilk bağlananlardan biri idi. 1991-ci ildə kilsənin binası Rus Pravoslav Kilsəsinə qaytarıldı, 2001-ci ildə bərpa edildikdən sonra Moskva və Bütün Rusiyanın Patriarxı II Aleksiy tərəfindən təqdis olundu. Kilsəyə Bakı Yeparxiyasının kafedral kilsəsi statusu verilmişdir.

Taxt-tac bayramı günündə bayram ibadətinə Bakı və Azərbaycan Yeparxiyasının rəhbəri vəzifəsini müvəqqəti icra edən Pyatiqorsk və Çərkəz arxiyepiskopu Feofilakt başçılıq etdi. İlahi Liturgiya zamanı arxiyereyi Yeparxiya kilsələrinin baş keşişləri və kafedralın ruhaniləri müşayiət ediblər. Ənənəyə görə kilsənin ətrafında dini yürüş keçirildi və yürüşün sonunda arxiyepiskop Feofilakt toplaşanların hamısına arxipastır nəsihəti ilə müraciət etdi. Bayram ibadətində iştirak edənlərin hamısı üçün kafedralın həyətində ziyafət təşkil olundu.