Zəvvarlar Azərbaycanın şimal-qərb bölgəsində yerləşən xristian ziyarətgahlarını ziyarət ediblər

Bakı Yeparxiyasının zəvvarlıq şöbəsi paytaxt kilsələrinin imanlıları üçün Azərbaycanın şimal-qərb bölgəsində yerləşən xristian ziyarətgahlarına səyahət təşkil edib. Üç gün ərzində zəvvarlar respublikanın Qəbələ, Oğuz və Qax rayonlarına səfər ediblər.

Xristian irsi ilə tanışlıq Oğuz ziyarətgahlarını, xüsusilə də Qafqaz Albaniyası tayfalarından birinin nəslindən olan pravoslav udinlər tərəfindən 1822-ci ildə tikilmiş Oğuz şəhəri böyük knyaz Aleksandr Nevskiy kilsəsini ziyarət etməklə başladı. Kilsə sovet dövründə bağlanılmışdır və hal hazırda kilsənin binası tarix və etnoqrafiya muzeyi kimi istifadə olunur. Qax rayonunda zəvvarlar Qax şəhərində, Əlibəyli və Kötüklü kəndlərində yerləşən gürcü pravoslav kilsələrini ziyarət etmiş, burada gürcü-inqiloyların yerli icmalarının nümayəndələri tərəfindən hərarətlə qarşılanmış, həmçinin Kürmüx Müqəddəs Böyük Şəhid Georgiy kilsəsinə qalxıblar. Qum kəndində zəvvarlar Qafqaz Albaniyasının erkən orta əsrlərə aid məbəd memarlığı abidəsi ilə - V-VI əsrlərə aid üçnefli bazilika ilə tanış olublar. Tədqiqatçılar hesab edirlər ki, bu kilsə III Mömin Vaçaqan dövründə tikilib, onun hakimiyyəti dövründə Qafqaz Albaniyası özünün mənəvi çiçəklənmə dövrünü yaşayıb. Bazilikanın Müqəddəs Məryəmin Mövluduna həsr edildiyi barədə məlumatlar var.

Bazar günü, mayın 26-da zəvvarlar Qəbələ rayonunun Nic kəndindəki Müqəddəs Elişa kilsəsində alban-udi xristian icmasının dəvəti ilə keçirilən İlahi Liturgiyada iştirak ediblər. Xatirəsi həmin gün qeyd olunan Müqəddəs Elişa Həvari Taddayin şagirdi və Qafqaz Albaniyasında İncili ilk vəz edən idi. Cənubi Qafqazda bir çox kilsələr qədim zamanlardan bu müqəddəsə həsr olunurdu.

Zəvvar qrupunu səfərdə Bakı Yeparxiya İdarəsinin katibi, protoiyerey Dionisiy Sveçnikov və zəvvarlıq şöbəsinin əməkdaşları müşayiət ediblər. Azərbaycan Respublikası Dini Qurumlarla İş üzrə Dövlət Komitəsinin Oğuz və Qax regional bölmələrinin nümayəndələri ölkənin şimal-qərb bölgəsində xristian ziyarətgahlarının ziyarətinə hərtərəfli dəstək veriblər.