Nic kəndində müqəddəs Elişanın xatirəsi təntənəli şəkildə qeyd olunub

Müqəddəs Elişa Həvari Taddayın şagirdi və Qafqaz Albaniyasında İncilin ilk vaizi idi. 2022-ci il dekabrın 24-də Bakı Yeparxiyasının Yeparxiya iclasında hər il Pasxa sonrası 4-cü Rəbb günü Müqəddəs Elişanın xatirəsinin qeyd edilməsi qərara alınmışdır.

Cənubi Qafqazda bir çox kilsələr qədim zamanlardan mqd. Elişaya həsr olunurdu. Belə kilsələrdən biri də Azərbaycanın Qəbələ rayonunun Nic kəndindəki Müqəddəs Elişa “Cotari” kilsəsidir. Alban-Udi xristian icmasının dəvəti ilə Bakı Yeparxiyasının katibi protoiyerey Dionisiy Sveçnikov, protodiakon Vadim Tokarevin müşayiətilə Qafqaz Albaniyasına məsihi nurunu gətirən mqd. Elişanın anım günündə İlahi Liturgiya ibadətini keçirib. İbadət zamanı ilahilər N.İsrafilovanın rəhbərliyi altında Bakı şəhəri Müqəddəs Mürr-Daşıyan Zənənlər kafedral kilsəsinin xoru tərəfindən ifa olunub. Bakı Yeparxiyasının zəvvarlıq şöbəsi paytaxt kilsələrinin imanlıları üçün Nic qəsəbəsinə səfər təşkil edib. İlahi Liturgiyada bakılılar və pravoslav udilər ilə yanaşı xüsusi olaraq Nicə Müqəddəs Elişa bayramı üçün Rusiyadan gələn zəvvarlar da iştirak ediblər.

İbadətin sonunda protoiyerey Dionisiy kilsəyə toplaşanları salamlayaraq Nic kəndinin xristian ziyarətgahlarını ziyarət edən bütün zəvvarlara göstərdikləri səmimi qonaqpərvərliyə görə Alban-Udi icmasının üzvlərinə təşəkkürünü bildirdi.