Yepiskop Aleksiy Lənkəran şəhəri Allahın Əqdəs Validəsinin Dua Örpəyi kilsəsində İlahi Liturgiya keçirib

Allahın Validəsi ikonasının Kazan şəhərində tapılması bayramının qeyd edildiyi gündə Bakı və Azərbaycan yepiskopu Aleksiy Lənkəran şəhərindəki Allahın Əqdəs Validəsinin Dua Örpəyi kilsəsində İlahi Liturgiya keçirib. Arxiyereyi ibadət zamanı Bakı Yeparxiyasının katibi Dionisiy Sveçnikov, Lənkəran şəhəri Allahın Əqdəs Validəsinin Dua Örpəyi kilsəsinin baş keşişi protoiyerey Aleksandr Astaşkin, iqumen Kirill (Nikitin), Yeparxiyanın ictimai təşkilatlarla qarşılıqlı əlaqələr şöbəsinin rəhbəri protoiyerey Mefodiy Əfəndiyev, iyerey Roman Çertıkov və protodiakon Vadim Tokarev müşayiət ediblər. 
İbadətin sonunda pravoslav lənkəran ailəsi Sevgi, Ailə və Sədaqət Gününün qeyd edilməsi çərçivəsində nikahda 25 ildən artıq olan  cütlüklərə təqdim olunan “Sevgi və sədaqətə görə” medalı ilə təltif edildi. 
Ailə, Sevgi və Sədaqət Günü hər il iyulun 8-də qeyd olunan və nikah və ailənin himayədarları kimi ehtiram edilən Muromlu Müqəddəs Pyotr və Fevroniyanın xatirəsinə həsr olunmuş bayramdır. 47 il birlikdə ailə həyatı yaşayan Opanasyuk ailəsinə medalı və sertifikatı yepiskop Aleksiy və Bakı Rus Evinin rəhbər müavini Dmitriy Yeqorov təqdim ediblər.  
Sonra kilsənin həyətinə toplaşanların hamısına çay və şirniyyatlar təklif olundu. Çay süfrəsi arxasında imanlılarla söhbət edən yepiskop Aleksiy Dua Örpəyi kilsəsinin imanlılarına səmimi qəbula və birgə duaya görə təşəkkür edib və belə görüşlərin müntəzəm olacağını qeyd edib.