“Uşaqların məktəbə hazırlaşmasına yardım et" xeyriyyə aksiyasına start verilib

Sentyabrın 2-də, dərs ilinin başlanması ərəfəsində Bakı Rus Evində “Uşaqların məktəbə hazırlaşmasına yardım et" xeyriyyə aksiyasına start verilib. Tədbir Azərbaycan Respublikası Ailə, Qadın və Uşaq Problemləri üzrə Dövlət Komitəsinin, Rusiya Federasiyasının Azərbaycan Respublikasındakı Ticarət Nümayəndəliyinin, Azərbaycan Rus İcmasının, "Trans Export” və “GID CSR Consulting” şirkətlərinin dəstəyi ilə “Rossotrudniçestvo”nun Azərbaycandakı Nümayəndəliyi tərəfindən təşkil olunub.

Bakı Rus Evinin rəhbəri İrek Haydaroviç Zinnurov, Bakı və Azərbaycan yepiskopu Aleksiy həzrətləri, Dağıstan Respublikası Xalq Məclisinin sədri Zaur Asevoviç Askenderov, Ticarət Nümayəndəliyinin rəhbəri Ruslan Zaqitoviç Mirsayapov, Rusiya Federasiyasının Azərbaycandakı səfirliyinin 1-ci katibi Pavel Nikolayeviç Kuznetsov, "Trans Export" şirkətinin direktoru Olqa Kudlayeva və "GID CSR Consulting" şirkətinin təsisçisi Nigar Əliyeva aksiya iştirakçılarına - birinci sinif şagirdlərinə və onların valideynlərinə salamlama sözləri ilə müraciət ediblər.

Daha sonra 20-dən çox birinci sinif şagirdinə içində lazımi dərs ləvazimatları olan bel çantaları və xatirə hədiyyəsi - yumşaq oyuncaq paylanıb.