Bakı Beynəlxalq Muğam Mərkəzində Milad konserti keçirilib

Bakı Beynəlxalq Muğam Mərkəzində ənənəvi olaraq Milad günlərində Bakı Yeparxiyası tərəfindən təşkil olunan Milad konserti keçirilib. Tamaşaçılar qarşısında Azərbaycanın əməkdar artisti Vaqif Məstanovun rəhbərliyi altında Müqəddəs Mürr-Daşıyan Zənənlər kafedral kilsəsinin xoru, Kseniya Belıxın rəhbərliyi ilə Allahın Əqdəs Validəsinin Mövludu kilsəsinin xoru və Birləşmiş Xor Hərəkatının əməkdar xadimi Kristina Əfəndiyevanın rəhbərliyi altında Ali-Mələk Mikayıl kilsəsinin xoru çıxış etdilər. Musiqili gecənin proqramına Bakı və Sumqayıt musiqi məktəblərinin şagirdləri, Ü. Hacıbəyli adına Dövlət Musiqi Akademiyasının tələbələrinin ifasında musiqi əsərlər daxil edilmişdir. Bakı kilsələrinin bazar günü məktəblərinin şagirdləri müxtəlif nömrələr ilə çıxış etdilər.

Konserti Rusiya Federasiyasının Azərbaycandakı səfiri M. N. Yevdokimov, Belarus Respublikasının Azərbaycandakı səfiri A. A. Ravkov, diplomatlar və diplomatik nümayəndəliklərin əməkdaşları, din, ictimai və mədəniyyət xadimləri, Bakı kilsələrinin imanlıları seyr ediblər. Bakı və Azərbaycan yepiskopu Aleksiy tədbir iştirakçılarına salamlama nitqi ilə müraciət edib.