Azərbaycan Respublikasının Birinci vitse-prezidenti Mehriban Əliyeva Müqəddəs Mömin Böyük Knyaz Aleksandr Nevskiy kilsəsində olub

Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban Əliyeva, Gəncəyə işgüzar səfəri çərçivəsində, Müqəddəs Mömin Böyük Knyaz Aleksandr Nevskiy kilsəsində olub. Mehriban xanımı qızları Leyla Əliyeva və Arzu Əliyeva müşayiət edib.

Kilsədə ali qonaqları baş keşiş Varfolomey Sotnikov qarşılayıb, kilsənin tarixindən və hazırkı durumundan danışıb. Bildirilib ki, Azərbaycanın ən qədim pravoslav kilsələrindən biri olan Aleksandr Nevskiy kilsəsi bir sıra təmir-bərpa işlərinə ehtiyac duyur. Kilsə binası ilə tanışlıq zamanı Mehriban Əliyeva ölkəmizin tarixi-dini irsinin qorunub saxlanmasının vacibliyini vurğulayıb, ibadət yerlərinin, maddi mədəniyyət abidələrinin qorunması və bərpası Azərbaycan dövlətinin daim diqqət mərkəzində olduğunu bildirib. Aleksandr Nevskiy kilsəsində təmir-bərpa işlərin aparılması üçün müvafiq göstərişlər verilib.