Moskva və Bütün Rusiyanın Patriarxı Tixonun xatirəsinə həsr olunmuş konsert

Azərbaycan Dövlət Filarmoniyasının kamera və orqan musiqisi zalında Moskva və Bütün Rusiyanın Patriarxı Müqəddəs Tixonun xatirəsinə həsr olunmuş konsert keçirilib. Tamaşaçıları Bakı və Azərbaycan yepiskopu Aleksiy salamlayıb. Kristina Əfəndiyevanın rəhbərlik etdiyi Bakı şəhəri Ali-Mələk Mikayıl kilsəsi xorunun təqdim etdiyi konsert proqramında tanınmış müəlliflərin Böyük Oruc mövzusunda əsərləri səsləndirilib. Konsert zalında həmçinin "Patriarx Tixon adına Elm və Təhsil Fondu"-nun dəstəyi ilə Müq. Tixon Pravoslav Humanitar Universiteti tərəfindən hazırlanmış patriarx Tixonun həyatı və iman rəşadətinə həsr olunmuş sərgi nümayiş etdirilmişdir.

Konsertdə Rusiya Federasiyasının Azərbaycan Respublikasındakı fövqəladə və səlahiyyətli səfiri M.N. Yevdokimov, Azərbaycanda akkreditə olunmuş diplomatik nümayəndəliklərin əməkdaşları, ölkənin dini icmalarının və Azərbaycan Respublikası Dini Qurumlarla İş üzrə Dövlət Komitəsinin nümayəndələri, ictimaiyyət və mədəniyyət xadimləri, Bakı yeparxiyası kilsələrinin ruhaniləri və imanlıları iştirak ediblər.