Azərbaycanın dini liderlərdən ibarət nümayəndə heyəti Vatikan Apostol Kitabxanasını ziyarət edib

Azərbaycanın dini liderlərdən ibarət nümayəndə heyəti Vatikana səfəri çərçivəsində Vatikan Apostol Kitabxanasını ziyarət edib. Qafqaz Müsəlmanları İdarəsinin sədri, şeyxülislam Allahşükür Paşazadənin başçılıq etdiyi nümayəndə heyətinin tərkibinə Bakı və Azərbaycan yepiskopu Aleksiy, Azərbaycanda Katolik Kilsəsinin apostol prefekti yepiskop Vladimir Fekete, Alban-udi xristian icmasının sədri Robert Mobili və Bakı şəhəri Avropa yəhudiləri icmasının sədri Aleksandr Şarovski daxildir.

Vatikan Apostol Kitabxanasının prefekti don Mauro Mantovani qonaqları salamlayaraq kitabxananın tarixi və fəaliyyəti barədə məlumat verib. O qeyd edib ki, əsası 1475-ci ildə qoyulan Vatikan Apostol Kitabxanası dünyanın ən qədim və ən nüfuzlu elmi və mədəniyyət mərkəzlərindən biridir. Bu kitabxanada əsrlər boyu milyonlarla kitab və on minlərlə əlyazma qorunub saxlanılır. Kitabxananın fondlarında Azərbaycana aid təxminən 60 nadir əlyazma da mövcuddur.

Nümayəndə heyəti həmçinin Vatikan bağlarını ziyarət edərək 2025-ci il oktyabrın 17-də Azərbaycanın Birinci vitse-prezidenti Mehriban Əliyeva və Vatikan Şəhər Dövlətinin Qubernatoru rahibə Raffaella Petrini tərəfindən Azərbaycan ilə Vatikan arasında dostluq və qarşılıqlı hörmətin rəmzi kimi əkilmiş nar ağacına baxıblar.