Beynəlxalq Muğam Mərkəzində arxiyepiskop Aleksandrın vəfatının beşinci ildönümünə həsr olunmuş anım gecəsi keçirilmişdir

İyunun 10-da Bakı və Azərbaycan arxiyepiskopu Aleksandrın (İşein) vəfatının beşinci ildönümü tamam olur. Arxiyepiskop Aleksandr təxminən 30 il ərzində, onlardan 22 ilini 1998-ci ildə bərpa olunmuş Bakı yeparxiyasının rəhbəri kimi, Azərbaycanda xidmət göstərmiş. Arxiyepiskop uzun sürən ağır xəstəlikdən sonra 10 iyun 2021-ci ildə vəfat etmişdir. Azərbaycan Respublikasının Prezidenti İlham Əliyevin sərəncamına əsasən, Azərbaycanda dinlərarası və millətlərarası dialoqun möhkəmləndirilməsi, Azərbaycan multikulturalizm modelinin inkişafı, Azərbaycan və rus xalqları arasında dostluq münasibətlərinin möhkəmləndirilməsi sahəsində göstərdiyi mühüm xidmətlərə görə Bakı və Azərbaycan arxiyepiskopu Aleksandr I Fəxri Xiyabanda dəfn edilmişdir.

İyunun 9-da Beynəlxalq Muğam Mərkəzində arxiyepiskop Aleksandrın vəfatının beşinci ildönümünə həsr olunmuş anım gecəsi keçirilmişdir. Tədbirdə mərhum arxiyepiskopu uzun illər şəxsən tanımış Azərbaycanın dini icmalarının rəhbərləri və nümayəndələri, Rusiyanın Azərbaycandakı səfiri Mixail Yevdokimov, Belarusun Azərbaycandakı səfiri Dmitriy Pineviç, Azərbaycan Rus İcmasının sədri Mixail Zabelin və icma üzvləri, Bakı yeparxiyasının ruhaniləri, Bakı pravoslav kilsə icmalarının üzvləri, mərhumun dostları və yaxınları iştirak etmişlər.

Anım gecəsini Bakı və Azərbaycan yepiskopu Aleksiy açmışdır. Arxiyepiskop Aleksandr haqqında xoş xatirələrini Qafqaz Müsəlmanları İdarəsinin sədri şeyxülislam Allahşükür Paşazadə, Azərbaycanda Katolik Kilsəsinin Apostol Prefekti yepiskop Vladimir Fekete, Bakı Avropa Yəhudiləri Dini İcmasının sədri Aleksandr Şarovskiy, Alban-Udi Xristian Dini İcmasının sədri Robert Mobili və Azərbaycan Rus İcmasının sədri Mixail Zabelin bölüşmüşlər.

Tədbirdə Müqəddəs Mürr-Daşıyan Zənənlər kafedral kilsəsinin xoru (Azərbaycanın əməkdar artisti Vaqif Məstanovun rəhbərliyi altında), Allahın Əqdəs Validəsinin Mövludu kilsəsinin xoru (Nərgiz Voronkovanın rəhbərliyi altında ) və Ali-Mələk Mikayıl kilsəsinin xoru (Birləşmiş Xor Hərəkatının əməkdar xadimi Kristina Əfəndiyevanın rəhbərliyi altında) çıxış etmişlər. Gecənin bədii tərtibatını Larisa Kərimova hazırlamışdır. Tədbir iştirakçılarına həmçinin arxiyepiskop Aleksandrın həyat və fəaliyyətinə həsr olunmuş tematik fotosərgi təqdim edilmişdir.