Nic kəndində Müqəddəs Elişanın xatirəsi anılıb

Müqəddəs Elişa, Həvari Taddayın şagirdi və Qafqaz Albaniyasında İncilin ilk təbliğçisi idi. Qədim dövrlərdən bəri Cənubi Qafqaz ərazisində bu müqəddəsə çoxlu kilsələr həsr olunmuşdur. Onlardan biri də Qəbələ rayonunun Nic kəndindəki Müqəddəs Elişa “Cotari” kilsəsidir.

Bayram günü Nic kilsəsində İlahi Liturgiyanı Alban-Udi Xristian icmasının dəvəti ilə, Bakı və Azərbaycan yepiskopu Aleksiy keçirib. Liturgiyanın sonunda kilsə ətrafında bayram dini yürüşü keçirilib.

İbadətdə Alban-Udi icmasının üzvləri, Bakıdan və Rusiyadan xüsusilə gələn zəvvarlar dua ediblər. Liturgiyanın ilahiləri Şalva Abasovun rəhbərliyi altında Bakı kafedral kilsəsi xorunun ifaçıları tərəfindən səsləndirilib.

İbadətin sonunda yepiskop Aleksiy kilsəyə toplaşanlara bayram mövzusunda vəz ilə müraciət edib. Yepiskop Aleksiy, Alban-Udi icmasının sədri Robert Mobiliyə və icmanın ruhani başçısı Rafik Danakariyə səmimi qonaqpərvərliyə və birgə duaya görə təşəkkür edib.