Bazar məktəblərinin şagirdləri Lənkəran rayonuna səfər ediblər

Tədris ilinin başa çatması münasibətilə Bakı şəhərində fəaliyyət göstərən pravoslav kilsələrinin bazar məktəblərinin şagirdləri üçün, Bakı və Azərbaycan yepiskopu Aleksiy xeyir-duası ilə, Yeparxiyanın zəvvarlıq şöbəsi tərəfindən Azərbaycanın ən cənub prixodu – Lənkəran şəhərindəki Allahın Əqdəs Validəsinin Dua Örpəyi kilsəsinə səfər təşkil olunub.
Lənkərana gedərkən uşaqlar onları müşayiət edən böyüklərlə birlikdə 2003-cü ildə Salyan və Neftçala rayonlarının ərazisində yaradılmış Şirvan Milli Parkında olublar. Park Azərbaycanın «Qırmızı Kitabı»-na daxil edilmiş ceyranların və nadir su quşlarının qorunması məqsədilə yaradılıb. Qonaqlar üçün təşkil olunan ekskursiya zamanı uşaqlar qoruğun zəngin flora və faunası ilə tanış olublar.
Lənkərandakı kilsədə tədris ilinin uğurla başa çatması münasibətilə şükranlıq dua mərasimi keçirilib. İbadət zamanı ilahiləri Bakı şəhəri Ali-Mələk Mikayıl kilsəsinin uşaq xoru ifa edib.
Dua mərasimindən sonra Zəvvarlıq şöbəsinin əməkdaşı Yekaterina Şmelkova gənc zəvvarlar adından kilsəyə «Uşaqlara xeyir-dua» adlı Xilaskarın ikonasını hədiyyə edib. Kilsənin baş keşişi protoiyerey Aleksandr Astaşkin uşaqlara bu qiymətli hədiyyəyə görə təşəkkürünü bildirib, onları tədris ilinin uğurla başa çatması münasibətilə təbrik edib və hamıya müqəddəs su səpib . Daha sonra kilsənin həyətində iştirakçılar üçün çay süfrəsi təşkil olunub.
Səfər Hirkan Milli Parkının füsunkar guşələrindən birində davam edib. Burada uşaqlar və böyüklər təbiət qoynunda dincəlib, müxtəlif idman və inkişafetdirici oyunlarda iştirak ediblər.
Qrupu səfər boyu Bakı şəhəri Ali-Mələk Mikayıl kilsəsinin baş keşişi protoiyerey Mefodiy Əfəndiyev və Sumqayıt şəhəri Müqəddəs Sarovlu Serafim kilsəsinin baş keşişi Rostislav Şaxvələdov müşayiət ediblər.