Yepiskop Aleksiy Stavropol Ruhani Seminariyasının məzun buraxılışı mərasimində iştirak edib

4 iyul 2026 il tarixində Stavropol Ruhani Seminariyasında, 1846-cı ildə bu ruhani təhsil ocağının fəaliyyətə başlamasından bəri 113-cü məzun buraxılışı münasibətilə təntənəli mərasim keçirilib. Tədbir Stavropol şəhəri Müqəddəs Andrey kafedral kilsəsində bayram İlahi Liturgiyadı ilə başlayıb. İbadətə Stavropol və Nevinnomıssk mitropoliti Kirill başçılıq edib. Mitropolit Kirilli Bakı və Azərbaycan yepiskopu Aleksiy, Stavropol Ruhani Seminariyasının rektoru protoiyerey Pavel Samoylenko, Rus Pravoslav Kilsəsinin Gənclərlə İş üzrə Sinodal Şöbəsinin sədri vəzifəsini icra edən iyeromonax Filaret (Zubov), seminariyanın müəllimləri və keşiş rütbəsində olan məzunları müşayiət ediblər. İlahi Liturgiyada ruhani məktəbin rəhbərliyi, müəllim heyəti, tələbələr, Stavropol Ruhani Seminariyasının məzunları və Müqəddəs Andrey kafedral kilsəsi icmasının möminləri dua ediblər.

Liturgiyadan sonra Stavropol mitropoliyasının rəhbəri yepiskop Aleksiyi salamlayıb, ruhani məktəbin rəhbərliyini, müəllimlərini və məzunlarını bu əlamətdar hadisə münasibətilə təbrik edib. Yepiskop Aleksiy də tədbir iştirakçıları qarşısında təbrik nitqi ilə çıxış edib.

Daha sonra Stavropol Ruhani Seminariyasının tarixi binasında təntənəli məzun buraxılışı mərasimi keçirilib. Tədbirdə Stavropol diyarının dövlət və təhsil qurumlarının nümayəndələri, kazaklar və digər qonaqlar iştirak ediblər. Salamlama və təbrik çıxışlarından sonra Stavropol və Nevinnomıssk mitropoliti Kirill və Bakı və Azərbaycan yepiskopu Aleksiy məzunlara ruhani məktəbi bitirmələri haqqında diplomları təqdim ediblər.

2025–2026-cı tədris ilinin yekunlarına əsasən, Stavropol Ruhani Seminariyasını əyani pastorluq şöbəsi üzrə 10 tələbə, qiyabi şöbə üzrə 17 tələbə, reqentlik şöbəsi üzrə 12 tələbə və kilsə icmaları üzrə mütəxəssislərin hazırlanması şöbəsi üzrə 12 məzun bitirib.