Yepiskop Aleksiy Allahın Əqdəs Validəsinin Mövludu kilsəsində aparılan abadlıq işləri ilə tanış olub

Bakı və Azərbaycan yepiskopu Aleksiy Bakı şəhəri Allahın Əqdəs Validəsinin Mövludu kilsəsində aparılan abadlıq işlərinin gedişi ilə tanış olub. Son iki il ərzində kilsənin baş keşişi protoiyerey Aleksandr Novikovun səyləri nəticəsində həm məbədin daxilində, həm də ona bitişik ərazidə bir sıra işlər həyata keçirilib. Xüsusilə, vəftizxana tamamilə yenidən qurulub, böyüklərin vəftizi üçün yeni vəftiz hovuzu hazırlanıb və hazırda divarların dini təsvirlərlə bəzədilməsi işləri aparılır. Müqəddəs Radonejli Serginin şərəfinə həsr olunmuş yan ibadətgah hissəsində təmir işləri davam etdirilir. Məbədin altar hissəsinin pəncərələrində müqəddəslərin ikonalarının təsvir olunduğu yeni vitrajlar quraşdırılıb. Son iki il ərzində kilsənin ərazisində genişmiqyaslı yaşıllaşdırma işləri də həyata keçirilib: iynəyarpaqlı və meyvə ağacları, dekorativ bitkilər, qızılgül və dəfnə kolları, eləcə də müxtəlif güllər əkilib. Yepiskop Aleksiy görülən işləri müsbət qiymətləndirib və məbədin rifahı naminə zəhmət çəkən hər kəsə arxipastır xeyir-duasını verib.