Uşaq bazar günü məktəblərinin şagirdləri üçün «Yay düşərgəsi»

Sentyabrın 2-i və 3-ü Bakı və Azərbaycan yepiskopu Aleksinin xeyir-duası ilə Bakı şəhərində fəaliyyət göstərən uşaq bazar günü məktəblərinin şagirdləri üçün «Yay düşərgəsi» layihəsi təşkil olunub. Son bir neçə il ərzində artıq ənənəyə çevrilən «Yay düşərgəsi» Bakı şəhəri Ali-Mələk Mikayıl kilsəsinin baş keşişi protoiyerey Mefodiy Əfəndiyevin təşəbbüsü, «VTB – Azərbaycan» bankının sponsor dəstəyi və Azərbaycan Rusdilli Gənclər Assosiasiyasının (ARGA) könüllülərinin təşkilati iştirakı ilə həyata keçirilir. Bu il xeyriyyə layihəsinin keçirilməsi üçün Azərbaycanın cənub bölgəsi — Lənkəran şəhəri seçilib.

Düşərgənin açılış mərasimində protoiyerey MefodiY Əfəndiyev və «VTB – Azərbaycan» bankının PR meneceri Çinarə Rəhimova gənc iştirakçıları salamlayaraq, onlara xoş istirahət və yüksək əhval-ruhiyyə arzulayıblar.

ARGA könüllüləri uşaqlar üçün maraqlı və zəngin ikigünlük proqram hazırlayıblar. Proqram çərçivəsində maliyyə savadlılığı və rəsm üzrə ustad dərsləri, müxtəlif idman oyunları və yarışlar, həmçinin «Nə? Harada? Nə zaman?» intellektual oyunu keçirilib. Layihənin sonunda uşaqlara xatirə hədiyyələri təqdim olunub.

«Yay düşərgəsi» layihəsində Bakı şəhəri Müqəddəs Mürr-Daşıyan Zənənlər kafedral kilsəsinin, Ali-Mələk Mikayıl kilsəsinin və Allahın Əqdəs Validəsinin Mövludu kilsəsinin uşaq bazar günü məktəblərinin şagirdləri, Birinci və İkinci Qarabağ müharibəsi veteranlarının övladları, eləcə də aztəminatlı ailələrdən olan uşaqlar iştirak ediblər.