Yepiskop Aleksiy beynəlxalq elmi-praktik konfransda iştirak edib

Bakı və Azərbaycan yepiskopu Aleksiy görkəmli Azərbaycan mütəfəkkiri və alimi Şeyx Seyid Yəhya Bakuvi Şirvaniyə (XV əsr) həsr olunmuş I Beynəlxalq elmi-praktik konfransın plenar iclasında iştirak edib. «İslam dünyasının mədəni irsində Seyid Yəhya Bakuvi zirvəsi: mötədil dəyərlər və müasir çağırışlar» mövzusunda keçirilən konfrans Türk Dövlətləri Təşkilatına (TDT) üzv ölkələrin müsəlman dini idarələri rəhbərləri Şurasının 7-ci iclası çərçivəsində təşkil olunub. Tədbirin birgə təşkilatçıları Qafqaz Müsəlmanları İdarəsi, Türk Dövlətləri Təşkilatı, Azərbaycan Milli Elmlər Akademiyası, İSESKO, İslam Tarixi, İncəsənəti və Mədəniyyətinin Tədqiqi Mərkəzi və Müsəlman Ağsaqqalları Şurası olub. «Gülüstan» sarayında keçirilən konfrans dünyanın 40 ölkəsindən 200-ə yaxın iştirakçını bir araya gətirib.