Bakı şəhərinin kafedral kilsəsində kilsənin taxt-tac bayramı qeyd edilib

Pasxadan sonra 3-cü Rəbb günü Kilsə Xilaskarın məqbərəsinə gəlib Məsihin dirilməsi xəbərini ilk olaraq eşidən müqəddəs mürr-daşıyan zənənlərin şücaətini tərənnüm edir. Mqd. Mürr-Daşıyan Zənənlər kafedral kilsəsinin taxt-tac bayramı ibadətinə Bakı və Azərbaycan yeparxiyasının rəhbəri vəzifəsini müvəqqəti icra edən, Pyatiqorsk və Çərkəz arxiyepiskopu Feofilakt başçılıq edib.  İlahi Liturgiya zamanı arxiyereyi yeparxiya kilsələrinin baş keşişləri və kafedralın ruhaniləri müşayiət edib. Ənənəyə görə kilsənin ətrafında Pasxa xaç yürüşü keçirildi. Yürüşdən sonra arxiyepiskop Feofilakt toplaşanların hamısına arxipastır kəlamı ilə müraciət etdi. İbadətdə Rusiyanın Azərbaycandakı fövqəladə və səlahiyyətli səfiri M. N. Boçarnikov və Belarus Respublikasının Azərbaycandakı fövqəladə və səlahiyyətli səfiri A. A. Ravkov iştirak ediblər.  Bayram münasibətilə  yeparxiyanın zəvvarlıq şöbəsi tərəfindən Xaçmaz şəhəri müqəddəs Ecazkar Nikolay kilsəsinin imanlıları üçün Bakıya ziyarət təşkil edilib.
Kafedral kilsəsinin ərazisində ibadətdə iştirak edənlər üçün bayram ziyafəti təqdim olunmuşdur.