Pasxadan sonra 4-cü Rəbb Günü Azərbaycanda müqəddəs Elişanın xatirəsi qeyd olunur

Müqəddəs Elişa (I əsr) - Həvari Yahuda Faddeyin şagirdi və Qafqaz Albaniyasında İncilin ilk vaizi olmuşdur. Cənubi Qafqaz ərazisində bir çox kilsələr qədim zamanlardan bəri mqd. Elişaya həsr olunub. 2022-ci il dekabrın 24-də Bakı Yeparxiyasının yeparxiya iclasında qərar qəbul edildi ki, mqd. Elişanın xatirəsi hət il Pasxadan sonra 4-cü Rəbb Günü qeyd olunsun.

Bu il ilk dəfə olaraq Qafqaz Albaniyasının müqəddəs maarifçisinin xatirəsi təntənəli şəkildə Qəbələ rayonu Nic kəndində, Əqdəs Allah Anası (“Bulun”) kilsəsində keçirilib. Alban-Udi Xristian icmasının dəvəti ilə İlahi Liturgiyanı Bakı və Azərbaycan yeparxiyasının katibi arximandrit Aleksiy (Nikonorov) protodiakon Vadim Tokarevin müşayiəti ilə keçirib. Liturgiya ilahiləri M.Klimovun rəhbərlik etdiyi kafedral kilsəsinin kvartetinin ifasında səslənib. Bakı yeparxiyasının zəvvarlıq şöbəsi paytaxt kilsələrinin imanlıları üçün Nic kəndinə səfər təşkil edib. Pravoslav udinlərlə birlikdə mqd. Elişa bayramında 50-yə yaxın insan iştirak edib.

İbadətin sonunda arximandrit Aleksiy Alban-Udi icmasının sədri Robert Mobiliyə ölkəmizin xristian icmaları arasında ruhani qardaşlığa və udinlərin qədim xristian ocaqlarını ziyarət edən bütün zəvvarlara hər zaman göstərdikləri qonaqpərvərliyə görə minnətdarlığını bildirib.