Xristian və digər qeyri-müsəlman dini icmaların rəhbərləri və nümayəndələri Şəmkir şəhərinə səfər edib

Azərbaycanda fəaliyyət göstərən xristian və digər qeyri-müsəlman dini icmaların rəhbərləri və nümayəndələri Şəmkir şəhərinə səfər edib. Səfər Dini Qurumlarla iş üzrə Dövlət Komitəsi tərəfindən Azərbaycan Bibliya Cəmiyyətinin dəstəyi ilə təşkil olunub. Səfər çərçivəsində Şəmkir şəhərinin tarixi evangelik-lüteran kilsəsində Bakı şəhəri evangelik-lüteran icmasının ibadəti keçirilib. Dua məramisinə adı çəkilən icmanın dini rəhbəri pastor Gerxard Lemke başçılıq edib. Tədbirdə Dövlət Komitəsinin sədr müavini Səyavuş Heydərov, Şəmkir rayon icra hakimiyyətinin sədr müavini Süleyman Zeynallı, şəhər ictimaiyyəti iştirak edib.

Daha sonra dini icmalar nümayəndələri ümummilli lider Heydər Əliyevin heykəlini ziyarət edib, önünə gül dəstələri düzüblər.

Bakı yeparxiyasını Bakı şəhəri Ali-Mələk Mikayıl kilsəsinin keşişi Andrey Bezotosnıy təmsil edib.