Bazar günü məktəbinin şagirdləri dünyanın ilk tanker-muzeyi olan “Suraxanı” gəmisində olublar

Bakı şəhəri Ali-Mələk Mikayıl kilsəsinin nəznində fəaliyyət göstərən uşaqlar üçün bazar günü məktəbinin yuxarı qrupunun şagirdləri dünyanın ilk tanker-muzeyi olan “Suraxanı” gəmisində olublar. Mədəni tədbir Uşaqların Beynəlxalq Müdafiəsi Gününün qeyd olunması çərçivəsində təşkil olunub. Ekskursiya zamanı uşaqlara Xəzər dənizi ilə bağlı maraqlı faktlar, ölkəmizdə gəmiçiliyin inkişafı, Abşeronda neft hasilatı və onun nəqli haqqında danışılıb. Həmçinin gənc ekskursiyaçılar gəmiçiliyin ayrılmaz atributları olan naviqasiya vasitələri, gəmilərin istismarında istifadə olunan avadanlıqlar, gəmi təmiri doklarının iş prinsipi ilə yaxından tanış ola bilmişlər. Gəmilərin yanalmasında istifadə olunan düyünün bağlanması üzrə master-klass, eləcə də simulyatordan istifadə edərək tankeri yanalma körpüsünə bağlamaq və açıq dənizdə gəmi sürərkən özünü kapitan kimi hiss etmək imkanı uşaqları çox sevindirdi.

Azərbaycan dənizçilərinin topladığı balıqqulağı kolleksiyası, dəniz naviqasiyasına aid ən nadir eksponatlar, dəniz nəhəngləri hesab edilən gəmilərin maketləri, ekipajın məişəti ilə tanışlıq və s. uşaqlarda və onları müşayiət edən böyüklərdə əsl maraq oyatmışdır.