Bakıda Sevgi, Ailə və Sədaqət Günü qeyd olunub

8 iyul ənənəvi olaraq Sevgi, Ailə və Sədaqət Günü kimi qeyd olunur. Həmin gün Kilsə nikahın və ailənin himayədarları kimi ehtiram edilən Muromlu müqəddəslər Peter və Fevroniyanın xatirəsini yad edir. 2008-ci ildə Ailə, Sevgi və Sədaqət Günü ümumrusiya miqyasında qeyd olunan bayrama çevrilib. 
Bakıdakı Rus Evində ("Russkiy Dom") "Rossotrudniçestvo" nümayəndəliyinin və Bakı yeparxiyasının birgə təşkilatçılığı ilə bu günə həsr olunmuş bayram tədbiri keçirilib. Hər il Sevgi, Ailə və Sədaqət Günündə 25 ildən artıq nikahda olan ailələr “Sevgi və sədaqətə görə” medalı ilə təltif olunurlar. Bu il Bakı yeparxiyasının təklifi ilə bu mükafat protoiyerey Georgiy Tsurikov və həyat yoldaşı Nina Tsurikovaya verilib.
Bayram konsertində Bakı şəhəri Ali-Mələk Mikayıl kilsəsinin xoru çıxış edib.
Tədbirdə Bakı Yeparxiya İdarəsinin katibi arximandrit Aleksiy (Nikonorov) və Ali-Mələk Mikayıl kilsəsinin baş keşişi protoiyerey Mefodiy Əfəndiyev iştirak ediblər.