Qafqaz Müsəlmanlarının dini lideri Vatikanın dövlət katibinin şərəfinə ziyafət verib

Müqəddəs Taxt-Tacın Dövlət katibi kardinal Pietro Parolinin başçılıq etdiyi nümayəndə heyəti iyulun 8-dən 11-dək Azərbaycanda səfərdədir. Səfər Azərbaycan ilə Müqəddəs Taxt-Tac arasında diplomatik əlaqələrin qurulmasının 30-cu ildönümünə təsadüf edir.

Azərbaycan ilə Müqəddəs Taxt-Tac arasında siyasi dialoq ən yüksək səviyyədədir və bunu həm Prezident İlham Əliyevin və birinci xanım Mehriban Əliyevanın Vatikana rəsmi səfərləri, habelə Roma Papası Fransiskin Azərbaycana səfəri, həm də Müqəddəs Taxt-Tac ilə Heydər Əliyev Fondu arasında mədəni və humanitar sahələrdə uzunmüddətli səmərəli əməkdaşlığı göstərir. Fond tərəfindən Azərbaycanın Birinci vitse-prezidenti Mehriban Əliyevanın təşəbbüsü ilə Vatikanda bir sıra tarixi abidələrin bərpası dünya mədəni irsinin qorunmasına mühüm töhfədir.

İyulun 10-da Qafqaz Müsəlmanlarının dini rəhbəri Şeyxülislam Allahşükür Paşazadə öz iqamətgahında ali qonağın şərəfinə ziyafət verib. Tədbirdə siyasətçilər, dövlət rəsmiləri, Milli Məclisin deputatları, Azərbaycanın ənənəvi dinlərinin liderləri iştirak ediblər. Bakı Pravoslav Yeparxiyasını Yeparxiya İdarəsinin katibi Arximandrit Aleksiy (Nikonorov) təmsil edib.